Rev 1 | BEF | STEP | Yesu Kilisito le'mo belegepa ito lu'ehina kaga kana'a yatama mehu'ehigo ana'ina huto hilibe luto Hu'ma lu'ehina ya'ma Hu'mamofihi agoya bona'a lu epilibe luto Yesuhi lu emilago ai agelo'amofihi lifilago agoya bo'a Yonita lu nimito nelepi'ehina.

Revelation of John 1

Yesu le'mo hetofa huto lu'ehina ka'a

1 Yesu Kilisito le'mo belegepa ito lu'ehina kaga kana'a yatama mehu'ehigo ana'ina huto hilibe luto Hu'ma lu'ehina ya'ma Hu'mamofihi agoya bona'a lu epilibe luto Yesuhi lu emilago ai agelo'amofihi lifilago agoya bo'a Yonita lu nimito nelepi'ehina. 2 To nani'ni ya'ma Hu'mamofihi bagaguti ka'a to Yesu Kilisitou lu huto hu'ehina ka'a ya'ma bu goya ito keheli'ohunamofita yabe luto keheli'ohuto maga lu huto nohube. 3 To fayahi ya'ma asaga'i amuya malalina kana'a alo'i tupa hu'ehinamo ni'inaya suguna ka lu huto hilina ya'ma leka sete lu epilanamo lenali hiti ya'ma ni'ibe. To ka fayahi ya'ma kehelilete keheliya ilana lenali nehana Hu'mau lusa gi lepolo'ehina'a lolo hite nehabe.

Hu'mamofihi yagapana'a li gehesa 7 lusa gi epi'ehina ka'a

4 Yonita nani'i Esia metoga Hu'mamofihi bona'a li gehesa 7 nehana lenali'i fayaha nasana ya'ma koyoto nolepube.

Hu'ma koyapa mino'ehina bo to minoto nohina bo to koyapa koyapa minalina bo aitoga ni'ina to sekele mamu'a hiti kefa hisa gobisa'alo hetofa kene'i 7 enalitogati ni'ina, 5 to Yesu Kilisito aitogati ya'ma lehe'mose'na to fuluna'a lenalitoga mino moloto minalibe. Yesu ai ya'ma Hu'mamofihi ka'a beto huto ligo ule'ale nohina bo to kohe toto pana'a filise'naguti ho tise'na yamofihi lamana baga'a to noto noto kaba bona'i Sipi Botini lenali bo lenogotinifu kaba huto nohibe.

Ai komopa'a limito ai'a golaha'atu foipanatiguti li okala hu leto'ehinamo ni'ibe. 6 Ya huloto ai'a afo'afu Hu'mamofihi le'mo hetofa hulenogo minalabe luto ai foya'a li etalabe luto analo mamufa gilata bona'i kapo'alugu lele'mo molo'ehina. Aitoga ya'ma fana meha'a hiti to amuya'a hiti ule'ale huto minalina minomo buto minalina'mu yabe. Lama'na ka.

7 Bu galo. Sopohi gupisalo alina'mu yabe. To bona'i asaga'magi enubutu bu galana'mu yabe. To Yesuhi magolohi fi'ahana bona'i hiti enali bu galana'mu to noto noto bona'i asaga'i enali ai'i bu gelete ai ka'a keheli meemi'ahana'mu yabe lite sipi yibi hafili hilana'mu yabe. Ya'ma ka'a ya huto huto hino. Lama'na ka.

8 Amuya'atu enebe ligilata bo Hu'mau ai koyapa koyapa mino'ehina bo to yatai nohuna bo to minomo buto minalina bo ai ya'ma ma luto nolibe: Nani'nisigo hapi hulatana to li su holatana afo'afita nohube luto nolube.

Kilisitohi mehi bu go'ehina

9 Lenalalutinifita Yonita nani hiti to lenali hiti Yesu kumu luto keke bake to Hu'mamofihi kapo'agu to keta'a hiti nasana kofito minolata nohuta yamofihi lenali hiti moneka liloto nominonamofita nani fayahi ya'ma koyoto nolepube. Nani Hu'mamofihi kaga'a to Yesuhi gi'a lu huto huto luna'mu luto Patamosi metoga hege nagamilugu ti'ehinalo noho lifigo he'mito nohuna. 10 Minoto kibina bomofihi kana'alo fuligu ya'ma Sikalafu'uba ai'a komopa'nimofihi bu'a li heligo nemegesagati nogo sipi pikuli ya suhi huto huto hu'ehina. 11 Huto higo ya'ma luto keheli'ohube: Nasana bu nogata ya'ma bukugu fayahi koyolotoka yagapana'ni li gehesa 7 kaitoga he'milago Efeso hepatoga to Semena hepa'i to Pegamuma hepa'i to Taitaila hepa'i to Satisi hepa'i to Filatelefia hepa'i to Leotisia hepatoga bilibe.

12 To nani ka'a lu nimina bo'a bu galube luto i behe huto lamu libi'i 7 golitu lolo hi'ahana ya'ma bu go'ohuna. 13 Libi'i folaganugu kene'i mone nohigo bu go'ohuna. Ai meha'a bona'magita suhi huto nohigo gukete silifi'auba yatamalo limito gigusa'a hiti legege huto mino'ehina. To anaga gilimi golitu lolo hi'ahana ya'ma mino'ehina. 14 To lataha'a oka'amofihi hapa'a ya'ma sopohi ya suhi huto koholi gulu gulu luto mino'ehina. To bu'a luga luga ya'ma logo guluya mehi ya suhi huto mino'ehina. 15 To gigusa'a luga luga'a ya'ma goli kefahi logogu loloto lo gini gini nolina ya suhi huto mino'ehina. To nogo'a sipi ya'ma nagami'i lisahi ya suhi huto huhu luto mino'ehina. 16 Yahi lamaga'aga ya'ma sonofi'i 7 liloto mino'ehina. To bagagutiya emita'i yatamalo mone buga megesaga to mone okaba'aga kono'ehina ya'ma limito ni'igo bu go'ohuna. To bu okaba'a yegemofihi silikeha'a ya suhi huto besa loloto mino'ehina. 17 Nani meha'a ya huto bu goloto i behe huto gigusagu hekili higo koloto mino'ohuna. Nefilina ya suhi huto ko'ohugo yahi lamaga'auba nugupisaga moloto ma luto noluto lu nimi'ehina: Kai kelesa melino. Nani kohe toto alihi moloto nohube. 18 To amuya bo afo'afita minomo buto minaluna'mu yabe. Nani fili'ohunagi aku'i ho tito to filise'na to yabalugu kafemofihi foloke'a nanigo li'ohube. 19 Kai ana'ina bu go'ahata ya'ma yatai huto nohina'a hiti to alihi huto hilina'a hiti mone'na fayahi koyo su hobo. 20 To nayahi lamaga'aga sonofi'i 7 ya'a hiti to libi'i 7 golitu lolo hi'ahana ya'ma bu go'ahata yamofihi suguna nasanamofihi hapa'a lu kimilugi kehelibo. Sonofi'i 7 ya'ma Hu'mamofihi yagapana'amagi li gehesa 7 enali'i kaba hi epalalana bona'i agelo bona'i ya suhi hite nehabe. To libi'i 7 ya'ma Hu'mamofihi ka keheli'ahana bona'magi li gehesa 7 nehana yabe.